SUN搞作：少膽虫手記：搞吹水台

壹全霉今日停牌，好多買咗股票嘅忠實擁躉今朝都call爆少膽虫個電話，劈頭就話：「隻爛股已經累我蝕咗好多喇喎！繼續停落去，我咪血本無歸？」正所謂打者愛也，條虫明白大家慰問、關心壹全霉嘅好意，所以就借呢度同大家講聲，我哋只係停一陣o架咋！因為壹全霉要出嘢呀！呢個消息，並不神秘，相信大家都會陸續收到。喺寶島嘅CheapTV，要嫁出去了！少膽虫一聽到呢個好消息，即刻買咗紮花，諗住搶喺肥豪之前，祝賀嫁女嘅淫賤黎！

「《爛果》最近退少咗幾張紙，即係代表我哋多咗人睇。為甚麼CheapTV仍然不能賣個好價錢？」有同事喺編採會議有此一問。少膽虫望一望淫黎，但見本來笑盈盈嘅淫黎面色突變，呢個時候，少膽虫將收埋喺枱底紮花拎出嚟，放喺淫黎面前，好大聲咁講：「黎黎等咗咁耐，個女終於都有人要！呢個係壹全霉有人認同嘅表現！」但係淫黎面色依然好黑，少膽虫再補多句，「第二啲電視對出品好多限制，咪無人要囉，我哋就唔同喇，誨淫誨盜，乜都講得，就係咁先有人爭呀！」淫黎聽到呢句，面上嘅笑容先慢慢返番嚟。

「雖然CheapTV賣咗出去，但係我哋依然要秉承無底線呢個傳統，只要作大作得有分量，《爛果》就會登。我哋同正義傳媒唔同，人哋扮晒清高，對同行嘅攻擊視而不見，又成日掛紀律表現喺口邊，做唔到嘢就無得留低，我哋《爛果》唔同，有嘅係人情味！」

「我哋甚至可以搞多個吹水台！」大家議論紛紛後，都將淫黎嫁女件事拋諸腦後，反而熱議點樣將一直hit爆嘅熄登「吹水台」條橋抄過嚟！少膽虫舉腳贊成，就抄個吹水台當一版吧！