政壇：政商定格：「民主阿婆」夜會港英舊電池食飯

政改當前，搞事嘅人頻頻密會，繼日前外號「李漢奸」嘅白鴿黨創黨主席李柱銘密會壹傳媒肥佬黎後，尋日輪到「民主阿婆」陳方安生同貪曾前特首曾蔭權爵士「身痕痕」，夜會一班港英「舊電池」食飯。上星期五搞事「四人幫」開會，尋日「大堆頭」，佢哋咁多地方食飯唔揀，偏偏喺東方報業集團灣仔門市隔籬嘅富豪飯店，即係送埋嚟益記者啫。

既然喺我哋隔籬食飯，邊個出席，記者當然睇得一清二楚。一共有九人出席嘅飯局，食到近十點至散場，飯腳全部都係回歸前港英政府嘅舊電池，包括貪曾夫婦、前政務司司長「民主阿婆」陳方安生、前行政局成員陳坤耀夫婦、錢果豐、王䓪鳴、麥列菲菲，仲有肥彭年代嘅憲制事務司施祖祥，舊電池濟濟一堂，咁大堆頭，不知幾熱鬧。上星期五，肥佬黎、李漢奸、天主教香港教區前主教陳日君樞機同前廣播處長張敏儀喺肥佬黎嘅加多利山寓所飯敍，唔見「民主阿婆」，但唔緊要，「民主阿婆」同張敏儀係好姊妹吖嘛，唔知係咪就係靠佢兩姊妹，喺兩餐飯中間互通消息，負責傳遞佢哋主子嘅訊息呢？

呢個大堆頭組合，心水清嘅人一睇就知，好可能就係上周五「搞事四人幫」飯局嘅「延續版」。尋晚餐飯食到十點至散場，貪曾夫婦先走，然後到「民主阿婆」，佢哋問乜都唔答，全程耍手擰頭。其他舊電池之後陸續離開，最後走嘅係陳坤耀夫婦，佢哋大約十點十五分至走，陳坤耀話佢哋食飯只為敍舊，並無其他。至於餐飯係邊個做東，就不得而知嘞，不過貪曾為人咁算死草，實唔係佢請啦。