政壇：搞搞政：修訂限奶令 政府或讓步

立法會本周四表決「限奶令」，至今有六名議員提出修訂，當中以謝偉俊提出、訂明禁令喺實施六個月後自動撤銷嘅「日落條款」獲最多議員支持，有頗大機會通過，但據聞食物及衞生局局長高永文已願意讓步，喺周四表決前口頭承諾實施六個月後檢討禁令，成功換取多名功能界別議員「轉軚」支持政府，預計呢個修訂會過唔到分組點票。

「限奶令」規定任何人喺二十四小時內兩度出境，就唔可以喺第二次出境時攜帶奶粉，例如有人喺尋日下午兩點正出過一次境，佢喺今日下午一點五十九分再出境就唔可以帶奶粉，但等多兩分鐘到兩點零一分就無問題，非常反智。工程界盧偉國就提出「隔夜條款」，提議將二十四小時內嘅限制，改為一日內不得出境兩次，但隔一晚即使唔夠二十四小時都可以，做法比較合理。

盧偉國嘅修訂暫時喺地區直選同功能界別分組，分別獲得十五、六名議員支持，反對同棄權嘅同樣有十五、六票，有一定機會通過。據聞食衞局認為有關修訂唔會嚴重妨礙執法，真係過咗亦無傷大雅，可能會「隻眼開隻眼閉」放生。事件再次證明「限奶令」推行太急，內容未經深思熟慮，食衞局惟有被迫跪低投降。