政壇：吳永嘉請蘇錦樑食檸檬

為咗澄清「忌才」嘅謠傳，商務及經濟發展局局長蘇錦樑早前聯同佢嘅政治助理陳百里同場出現，趁機展現團隊精神，近日再有消息為蘇錦樑平反。消息透露，佢喺今年農曆新年後曾透過中間人搵廠商會副會長吳永嘉，初步探討佢有冇興趣做副局長，估計主要係睇中吳永嘉同傳媒關係良好，加上同業界一直有傾有講，對於求才若渴嘅蘇錦樑嚟講，吳永嘉可以幫佢手絕對係多贏方案，但世事嘅嘢邊有咁如意，聽聞吳永嘉最後禮貌地婉拒咗蘇錦樑。我哋曾打畀吳永嘉求證，直至截稿前未獲回覆。