政壇：拉布戰泛民收檔

立法會聽日審議財政預算案撥款，社民連「長毛」梁國雄同人民力量三子講到明會堅持拉布，聲言會就預算案合共提出約六百條拉布式修訂。若果政府喺五月底都不獲立會批錢嘅話，莫講話政府部門冇錢用，分分鐘連綜援戶都冇糧出。上屆立會拉布已為人詬病，泛民為免再牽涉其中紛紛縮沙，撤回之前提出嘅修訂，同拉布劃清界線。

公文袋嘅梁家傑仲死撐話，對長毛爭取嘅全民退休保障係支持，但用拉布爭取就唔係適切嘅做法，所以公文袋撤回修訂之餘，亦唔會就拉布修訂發言。佢哋仲話費事市民有「拉布疲累症」喎！

白鴿黨劉慧卿就話撤回修訂係唔想被外界曲解為佢哋支持拉布，但佢哋會照舊出席會議，有需要時亦會發言。對於人力鬧佢哋縮沙，卿姐就話唔希望啲人惡意攻擊白鴿黨。

而工黨何秀蘭亦都話，拉布係有威力嘅同政府討價還價嘅工具，不過今次會令佢哋要幫嘅對象成為受害者，所以唔會支持，仲話反正拉布分子提咁多修訂，實包括指出政府缺失，佢哋都冇必要重複咁話。

決策局長 無端受惠

其實，過往泛民都會就預算案提出修訂，其中例牌會削減決策局局長薪金以表對佢哋施政嘅不滿，班局長一般都會到立會應酬下。今次泛民自動收檔，局長可以將批評當拉布，將個波卸畀財爺鬍鬚曾唔回應，所以話班局長唔使去立會罰坐，最大「功臣」都係長毛佢哋嘞！