李漢奸跪完又跪 變色龍自暴其醜

有人話,政治一日都嫌長,真係冇講錯o架。政客就好似變色龍咁,反口覆舌,言而無信,五時花六時變,正所謂信佢一成,雙目失明。嗱嗱嗱,話口未完,外號「漢奸」嘅李柱銘又出醜喇。

話說反對派磨拳擦掌,準備就二○一七年特首普選方案同北大人玩鋪勁,點知不甘寂寞嘅李漢奸突然失驚無神拋出個「跪低」方案,聲稱願意接受沿用選委會提名方式,先選出五名候選人,再畀市民投票喎,仲話呢個係「最後底線」添。李漢奸話就話早已退出政壇,但佢除咗係白鴿黨創黨主席,而且一向以「民主鬥士」自居,依家「民主鬥士」變身「民主奸細」,唔知究竟黐咗邊條筋,搞到反對派口誅筆伐,群起攻之,連白鴿黨都要同佢劃清界線。李漢奸一見勢色唔對,即時跪低認衰,高調宣布「收回」方案,承認做法鹵莽,冇深思熟慮,除咗鞠躬謝罪自摑嘴巴,仲詐傻扮懵,話唔知點解會老貓燒鬚,可能係因為「心靈疲倦」喎。

呢啲咪叫唔衰攞嚟衰囉。係人都知,李漢奸數典忘祖,崇洋媚外,一向同北大人勢不兩立,早前仲話要參與「佔領中環」,聲稱願意被吊銷律師牌照,扮到成個烈士咁款,點知話口未完就跪低,仲要跪完呢邊跪嗰邊,簡直丟架。

正所謂,嫁出去嘅女,潑出去嘅水,李漢奸講出口嘅方案,全世界都聽到,無可抵賴,仲可以收得番嘅咩?正如有人話齋,老貓燒鬚係假,老而不就真,心靈疲倦係假,思維錯亂就真。

講到思維錯亂,李漢奸都唔係第一次嘅喇,今次可能係舊病復發咋。呢,當年董建華突然「腳痛」落台,新特首嘅任期究竟應該點計,引起各界爭議,建制派提議人大釋法,反對派就認為應由香港自己解決,正當雙方爭持不下,一向逢中必反嘅李漢奸居然喺電台節目中高調支持人大釋法,成個北京代言人咁款,搞到好多人仲以為聽錯添。而更奇怪嘅係,僅僅相隔兩小時,李漢奸又喺電台節目中自打嘴巴,聲稱感到後悔,要求收回釋法言論,仲話自己之前「未瞓醒」,所以講錯喎。

唉,上次未瞓醒,呢次就話心靈疲倦,訟棍就係訟棍,特別多藉口,亦特別面皮厚。計太一叮話齋,李漢奸都一把年紀咯,既然未瞓醒而搞到心靈疲倦,不如收皮早抖,發個春秋大夢,無謂成日出嚟現世喇。人貴有自知之明吖,李漢奸唔知醜啫,人哋都替佢醜喇,叮!

第一手消息請下載on.cc東方互動iPhone/iPad/Android/Windows Phone Apps