Sun奇古怪：Sun潮語：H7N9

今年剛剛係沙士爆發10周年，呢場令香港受到沉重打擊嘅世紀疫症，好多人依家諗番起都仲猶有餘悸。點知近日中國華東地區又爆發咗新型禽流感，死亡率奇高。暫時未知病毒會唔會人傳人，但係謠言同恐慌就已經開始人傳人，呢個消息早排仲令到香港股市下跌，搞到人心惶惶。其實可怕嘅地方可能並唔係疫症本身，而係我哋對上面處理疫症嘅手法唔放心就真，老百姓只能搞好個人衞生，慎防「H7N9」禽流感。

「H7N9」明明係疫症，點解又係潮語呢？是咁的，呢個「H7N9」無錯係最新禽流感嘅名稱，但係網上有人即刻就住呢個名，諗咗個笑話，唔知真定假。

話說當疫情啱啱發生，呢單嘢當然要報告世界衞生組織，而呢個組織嘅揸fit人就係當年有份處理香港禽流感、有「雞珍」之稱嘅陳馮富珍。當時呢個病毒連名都未有，但係已經有人不幸死咗。阿珍知道情況嚴重，要通報全世界，但病毒叫咩名好呢？於是阿珍就打畀香港嘅同鄉，依家貴為衞生局長嘅文仔問問咩環境。點知香港嘅阿文仔自己都好頭痕，搞到發晒老脾，就答:「珍姐，呢隻新病勁過以前嘅H5N1，我都唔知係乜，總之好X難搞啊！」阿珍聽到阿文仔咁講，突然靈機一觸！好X難搞嘅廣東話即係「Ho 7 Nan 9」咁上下，咁新病毒就叫「H7N9」啦！

於是「H7N9」除咗係新病毒名稱之外，亦都可以指一啲嘢真係「好X難搞」！至於「X」係乜嘢？呢樣嘢就唔使問文仔同珍姐都知係粵語粗口嘅諧音啦！不過，對於外省人嚟講，就未必get到啦！所以，以後遇到啲難搞嘢，都可以用「H7N9」嚟形容。