政壇：政商定格：王嘉恩宣揚武術正能量

前博愛總理王嘉恩（Albert）係超級「武癡」，收藏兵器遍及中外，近日佢迷上城中一套講述中國忠義家族為國效忠嘅武打片，愛上收藏電影兵器。睇完齣戲後，Albert馬上打畀電影製作人黃漪鈞，想將戲中嘅大關刀、長劍、弓箭、彎刀等，通通收歸旗下，多多錢都肯畀，不過，戲中件件兵器都係精心傑作，對方話賣唔賣要再度吓喎。

Albert好熱心宣揚武術，日前與推廣跆拳道嘅「香港智道總會」，齊齊包咗尖沙咀一間戲院搞電影籌款，免費請近二百位青少年睇戲，宣揚正能量。智道總會主席游錦榮話，善款將用於喺新界北區舉辦體育義教活動，免費教後生仔學跆拳道三個月，將有一百位青少年受惠，等佢哋多一技傍身。