政壇：搞搞政：新丁莫乃光 拒往獅城工作坊

立法會有多名新丁議員，經過半年熟習後，好多人都對議會工作逐漸上手，近日世界貿易組織（WTO）向議會發出邀請，有兩個議員可以去新加坡參加工作坊，惡補吓關於世界貿易及WTO嘅知識，我哋問過吓啲議員嘅反應，新丁莫乃光竟然話唔會參加。

WTO同新加坡南洋大學淡馬錫基金會貿易與談判中心每年都會邀請各地嘅議員參加工作坊，畀大家了解WTO嘅工作，雖然今年已經係第五年舉辦，不過，邀請香港議員都係第一次。睇番行程，參加者其中一晚會去濱海灣睇吓當地嘅服務業外，其他幾乎每日都係朝九晚五咁開會，除咗會議程序排到密密麻麻外，據聞唔少人都係因為工作坊嘅時間而打退堂鼓。

工作坊喺六月三日舉行，為期三日，代表資訊科技界嘅莫乃光一聽到會期就話「撞六．四，唔去！」工黨何秀蘭亦話，佢唔係工商事務委員會成員，所以留番個機會畀其他委員會成員喎。