政壇：肥媽唐唐細佬破冰合唱

特首選舉期間「梁營」同「唐營」鬥一番，但選舉時做「梁粉」嘅藝人肥媽Maria Cordero，尋日就同對家嘅唐英年細佬唐慶年同台大合唱英文歌《Stand by me》，仲話香港係自由地方，大家就算政見唔同都可合作喎，睇嚟肥媽真係有足夠分量擔任「香港營」或「齊心基金」嘅宣傳大使呀！

香港標準及檢定中心主席唐慶年尋日出席香港安全標誌及優質正印活動，作為活動大使嘅肥媽即場大展歌喉，當台下觀眾要求「安歌」時，佢就力邀台下嘉賓、包括唐慶年等人一齊上台唱歌。唐慶年本來都有啲猶豫，但見到隔籬個個企晒起身，佢亦惟有同其他嘉賓上台。不過唐慶年來來去去淨係識唱「Stand by me」呢句。

另外，唐英年喺獵頭公司任高層嘅堂細佬唐裕年，今個月就獲委任為香港科技大學校董會副主席及成員，任期三年。