官學爭地演鬧劇 弱勢政府百事哀

惠利惠利，惠民利民。九龍塘前李惠利校舍地皮本來係一塊惠及民生嘅市區地王，家陣居然變成官學爭奪嘅戰場，都唔知好嬲定好笑。

件事係咁嘅，港府早前建議將李惠利校址改為住宅用途，惹來一直對該地皮有興趣嘅浸會大學猛烈反擊，雙方互不讓步，到依家仲爭持不下。嗱，有關地皮用途嘅諮詢就快屆滿，有團體發表信念書撐浸大，勢要將件事搞大，睇嚟呢場爭地鬧劇仲有排搞，鹿死誰手仍係未知之數。

唉，爭地風波愈演愈烈，港府同大學過招，睇怕都係無轉彎餘地咯。古人話，貧不與富鬥，富不與官爭，問題係港府弱過弱雞，跛過跛腳鴨，連碼頭工潮都擺唔平，何況同大學爭地？睇怕都係衰收尾嘅喇。

本來呢，公說公有理，婆說婆有理，港府同浸大各自據理力爭，好難講邊個啱邊個唔啱，但係雙方所爭嘅始終係香港最寶貴嘅土地資源，咁就唔到公眾唔關注嘞。即係咁，浸大對李惠利地皮寸土必爭，如果用嚟發展教育事務，市民唔會反對，之不過搞中醫院咯喎，始終係私營機構，牟利性質，係咪符合公眾利益呢？係咪真正惠及市民呢？浸大又有冇一套完整計劃畀市民判斷呢？

當然啦，港府淪為眾矢之的亦唔怪得人o架。一來港產官僚醉心於做地產幫兇，成日鬧出官商勾結、利益輸送醜聞，話李惠利地皮唔係建豪宅，市民唔信唔出奇囉。二來咯喎，咁多官地白白糟蹋，唔係淪為被人霸佔嘅私人樂園，就係做咗富人會所私家俱樂部，港產官僚唔去收復失地，反而走去同大學爭地，咁又難怪被人話「盲搶地」嘅，係咪！

所以話，李惠利地皮何去何從，最後花落誰家，唔應該睇邊個夠惡，而係睇邊個最有道理，簡單講，即係睇邊個方案最有利市民。有名你叫啦，惠利惠利，最緊要惠民利民，而唔係官學爭利，如果港府同浸大都說服唔到公眾，只係互相指罵「你為利」，咁就真係口同鼻拗，雞同鴨講，你話幾肉酸呢！

一句講晒，與其大鬥法，不如諗辦法，港府同浸大無謂再嘈啦，快快攞個令人信服嘅方案出嚟，鬥吓邊個最有利市民大眾仲好啦，叮！