SUN搞作：打橫嚟講：一招打沉「反國教」

有條友為推銷中學會考聆聽試現場要用的收音機，手段卑劣可恥，居然，仲有報章稱佢為「補習名師」，真反智！

而更反智及叫人不明的，是考評局至今，仍要考生自備收音機應試，點解唔現場「直播」呢？考評局，你班粉皮個腦同籮柚係乜嘢構造o架？

香港教育之PK，係出邊有敗類「行蠱惑」，裏面班低能高層卻只懂「行政治」，幫手推動赤化。

嗱！看看今年通識科文憑試，有一條問題要考生睇住港人參與維園六四燭光晚會、登上釣魚島及為四川地震捐款賑災等圖片後，提問：「你認為有甚麼因素，驅使港人參與一些類似照片所示，與國家有關的重大事件？」和『香港人參與與國家有關的重大事件會加強他們對國民身份的認同。』你在多大程度上同意這看法？」這題佔二十分的，即五分一成績o架。

呢條問題及三張圖片，係想學生答「愛國」和「認同自己是中國人」啫！這類潛移默化加文攻武嚇式洗腦手段：一、發放訊息攻入學生的潛意識裏；二、係唔識答「愛國」和「做中國人」就不及格。

學生仔反國教吖嘛！學校唔教「愛國教育」吖嘛！你哋有權反對洗腦啫！但無權阻止考試局出題考試個喎！你哋咪唔好學囉！學校唔好教囉！睇吓邊個死？香港學生在這個渣滓滿布的教育世界裏成長，會有好人做嗎？有錢冇錢都要學啲高官和有錢佬咁！盡快送子女出國，快！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府