政壇：政商定格：利豐管理層酬金料倒退

利豐總裁及行政總裁樂裕民（Bruce Philip Rockowitz），由○一年起出任集團執行董事至今，近兩年集團業績雖然失禮少少，但都冇話失場，所以見佢舊年全年份董事酬金，爬過晒主席馮國綸頭，都可以理解。但呢啲係滯後數字，明年酬金肯定大倒退。

根據利豐公布嘅一二年年報，舊年支付嘅酌情獎金，原來係據一一年表現同服務而發放，即係話出年嘅酌情獎金，會依據一二年表現同服務發放，咁就弊傢伙，一二年堪稱為利豐最差一年喎，Bruce呢份咁勁嘅酌情獎金，容乜易係最後一次風光。

Bruce舊年薪金同津貼同對上一年無變，都係五十七萬二千美元，但佢份酌情獎金就勁升百分之五十四點零四，至六百三十二萬二千美元，令整份酬金厚增至六百九十五萬五千美元，足足比馮國綸多咗二百三十六萬五千美元。反觀馮國綸雖然去年五月榮升做集團主席，但舊年全年整份酬金就少咗百分之三點二二至四百五十九萬美元。