政壇：周一鑊將變性人當同志

早前勇敢出櫃，宣布自己係女同性戀者嘅名媛趙式芝，尋日喺中文大學出席一個有關同性戀議題嘅講座時，話出櫃後有唔少人讚佢勇敢，有位年輕富二代專登約佢食飯，話要多謝佢，點知出到嚟食飯時，呢位富二代竟然一身女裝打扮，而且係扮得好靚嗰隻，佢先明白原來對方都係一位同性戀者，但對方由於屋企背景問題，長期受壓唔能夠公開自己嘅性傾向，仲被迫要飛去外國扮讀書避世。

同場嘅仲有新任平機會主席周一嶽，有同性戀者喺台下質詢，問佢到底有幾明白同性戀者，仲問佢知唔知咩叫跨性別歧視，點知佢就自爆後生時曾幫人做變性手術，所以好明白想變性嘅人到底諗乜。佢呢番言論立即引起全場嘩然，令人質疑身為平機會主席嘅佢，好似唔知變性人與同性戀根本係兩回事。