政壇：傳馬逢國掌電影發展局

聽聞自○七年開始出任電影發展局主席嘅蘇澤光，任期屆滿六年將會卸任。有傳政府最近決定由「梁粉」、立法會體育、演藝、文化同出版界代表馬逢國接任主席，並會喺日內公布任命。

熟悉電影業中人都知道，馬逢國本身係資深電影製作同發行人，曾參與製作數十部電影同舞台劇作品，長期關心文化藝術工作，仲出任西九管理局董事多年，睇怕政府都係睇中佢有一定文化藝術底子，加上喺電影業界打滾多年，搵番個業界人物「揸莊」，較容易同業界中人打成一片。我哋曾向馬逢國查詢呢個新公職任命，直至截稿前未獲回覆。

唯一令人擔心嘅係佢身兼港區全國人大代表，泛民主派會否以此借題發揮，批評佢「染紅」電影發展局，支持拍埋晒啲「左派電影」呢？有心水清嘅人提醒，馬逢國曾講過「左派電影」冇得再發展落去，事關依家缺乏演員，唔知佢呢粒「定心丸」能否令泛民疑慮有所消減呢？