惠民政策一味拖 幼兒教育唔得掂

十年樹木，百年樹人，作育英才任重道遠，但對教育官僚來講，百年樹人嘅意思係年年復年年，唔知搞到邊一年。呢嗱，睇十五年免費教育就知啦，培育學界小幼苗嘅神聖任務拖得就拖，真係分分鐘拖你一百年o架，吹脹！

教育局公布成立二十人委員會，就推行十五年免費教育研訂具體建議。教育局局長吳克儉話喎，期望委員會兩年內完成工作，又話相信委員會一定可以從多角度探討同平衡各方需要，提出可行建議。

嗱，委員會多角度探討十五年免費教育之前，不如等太一叮多角度探討吳克儉先啦。佢早前喺立法會信誓旦旦咁話，十五年免費教育一定切實執行，而且係急事急辦。喂，家陣委員會要搞足兩年，咁叫急事急辦？十五年免費教育講咗咁耐仲停留喺吹水階段，咁叫切實執行？咪當市民係三歲細路哥啦！

唔使委員會研究，太一叮依家就可以講畀大家聽，港產官僚根本就係縮骨卸膊，敷衍民意。唔係咩？一項爭議咁少嘅惠民政策，仲有乜好顧慮呀？澳門做得到，台灣做得到，點解香港遲遲都做唔到呀？一句講晒，官老爺左研究右研究，無非想研究點樣將十五年免費教育拖到無影無蹤啫，吓話！

講都無人信，香港自詡知識型社會，號稱國際大都會，推行十五年免費教育居然連內地城市都不如。政府投資教育就係投資未來，點都無理由蹉跎歲月誤人子弟囉。所謂三歲定八十，免費幼兒教育已經係國際大趨勢，如果教育官僚真係有心有力嘅話，振臂一呼就水到渠成啦，何必再蹉跎歲月吖。

咪話太一叮踢爆吖，研究復研究，諮詢復諮詢，不過係掩耳盜鈴拖字訣嘅啫。咪睇吳克儉今日拍心口，第日佢就拍籮柚，局長任期一到，拍拍屁股就走咗去，你吹得佢脹？前朝曾蔭權政府乜嘢十大基建同埋六大產業，全部都係咁o架啦，講就講到天下無敵，做就做到軟弱無力，耍完一輪太極，耍到政息人亡夠鐘收檔嘞，就拍下籮柚走咗去，留低一大堆蘇州屎畀下手執。呢啲官場慣技，市民領教得多。

咁講啦，吳克儉，唔得掂。國民教育爛尾收場，北區學位未搞得掂，如果吳局長想洗脫污名，快快落實十五年免費教育！

吖，係呢，十年樹木，百年樹人，市民想有一個成材嘅教育局局長，唔知使唔使等一百年呢？叮！