SUN搞作：Sun官場現形記：傻佬爭認叻

近日兩位分掌教化同拆屋嘅膠官分別公布咗佢哋嘅工作，兩人互相傳閱大家嘅報告之後，決定互相篤爆。就等李衞深入敵後，向讀者披露呢段對話……

慳儉哥：啲人話你成隻熊貓咁，踢一踢先郁一郁喎！

佳　佳：我有成六千五百棟樓排住隊等緊我去查！你就真係慳啲喇，兩年先得一個會要開。

慳儉哥：我有兩個字永遠都掛喺心口，就係「部署」，做嘢梗係要一「步」接一「步」咁去「處」理o架啦。

佳　佳：你講嘢可唔可以具體少少？唔好連做人都咁慳儉啦！

慳儉哥：我做嘢就有板有眼嘅，例如個委員會，一直都好實在咁針對家長嘅訴求……呢啲係應變。至於你，意外之後隔成年先識do it right，就未免慢咗啲喇。

佳　佳：我係務實咁安排人手去解決問題。反而你個會連兩年之後要點做都未知，成班人得個等字……係咪你嘅腦力天生慳儉過人？

慳儉哥：你有所不知嘞，我做緊嘅工作係好長遠o架！所以先要冷靜咁去思考、計劃！

佳　佳：我諗我可以跟你學下嘢，做個有誠信嘅領導！