政壇：潘少驚死神半夜來訪

依家立法會議員每月人工八萬四千蚊，但唔少議員都hea吓hea吓過日子，好似新一屆會期只係過咗半年，早前就有啲議員私下傾過，估吓邊啲議員可能成為新一代嘅懶蛇喇！

不過，好彩仲有盡責嘅議員。勞聯喺立會嘅唯一議員、亦係議會新丁嘅「潘少」潘兆平上任超過半年，仍然誠惶誠恐，仲會因為開會太長，成個人攰到周身都痛。佢仲試過瞓覺瞓到半夜三更，擔心自己半夜猝死，第二日唔知搵邊個代佢發言喎！

潘少話佢喺農曆新年後動議保障職業安全嘅議案，由於當日太多議題需要討論，議案唔可以喺即晚完成，立會主席曾鈺成宣布翌日下晝續會。點知潘少當晚返屋企後仍然心繫立會，半夜瞓瞓吓覺仲突然驚醒，心諗如果自己遇到意外，第二日返唔到立會開會，都唔知可以搵邊個代佢發言喎。

聽證會坐足全程

聽落真係有啲誇張，睇嚟潘少都要放鬆吓先得，否則過分緊張，經常精神繃緊，好容易會出事o架！

潘少解釋，由於勞聯得佢一個立會代表，為免掛一漏萬，佢好多時寧願坐定定喺議事廳開會，都唔肯走上去辦公室睇直播。佢又話今屆唔少事務委員會都搞聽證會，聽吓民間對個別議題嘅意見，而呢啲聽證會多數都會朝九晚六咁舉行，雖然部分議員聽幾句後就會逃之夭夭，但潘少話自己為咗尊重發言人士或民間團體，好多時都會堅持坐足全程，搞到自己連休息嘅時間都冇。