疫魔防不勝防 求人不如求己

車公靈籤，玄之又玄。○三年港府高官求得下籤，嗰年爆發沙士；今年同樣求得下籤，香港又面臨疫症威脅，有時真係唔到你唔信邪。

嗱，爆發於中東嘅新沙士已經造成十七人感染十一人死亡，而內地嘅變種禽流感更加可怕，死亡率仲高過沙士添；而且不斷擴散，繼之前證實嘅兩死一危個案之後，江蘇又確診四宗病例，而且病情都係危重，問你怕未。

大家都知，中港兩地關係緊密，居民頻密來往，內地有難，香港都幾難獨善其身。當年爆發沙士，就係因為一名廣州教授將病毒傳入香港，結果搞到雞毛鴨血。依家個人遊旅客愈來愈多，危機無處不在，唔驚就假。

最令人擔心嘅係，內地當局根本冇吸取當年教訓，防疫依然係懶懶閒。呢，當年沙士疫症被指源自野味，其後內地當局煞有介事禁食野味，依家又點呢？

本報記者近日直擊港人北上買餸嘅熱點深圳東門菜市場，發現各式野味依然大行其道，檔主除咗出售雞鴨鵝等活家禽，唔少仲兼賣箭豬、石貍、鱷龜等奇珍異獸，屠宰場所衞生惡劣，滿地鮮血。正如學者話齋，各類野味棲身於唔同環境，帶有唔同病毒，將佢哋放埋一齊，可能出現交叉感染，產生基因洗牌效應，演化出毒性更強嘅新品種。

話時話，內地漠視疫症，亂象叢生，又點止亂賣野味咁簡單吖。就講上海嗰單新禽流感個案，病人二月入院，三月初死亡，但居然拖到三月底至公布，你話唔係隱瞞都冇人信喇。當年沙士輕易傳入香港，奪去二百九十九條人命，皆因內地官僚隱瞞疫情，加上港產官僚後知後覺，先至搞到咁大鑊咋。官僚隱瞞疫情，根本就係草菅人命。

本來呢，內地官僚靠唔住啫，只要港府做好把關工作都冇咁驚，可惜，天下烏鴉一般黑，兩地官僚都係一擔擔嘅咋。根據現行法例，旅客攜帶鮮雞返港屬違法行為，但記者發現唔少深圳雞販教港人以「拖水」方法攜帶半熟雞過關，結果掂行掂過，毫無阻滯，你話當局究竟點樣把關？食衞局局長高永文仲話已提高警惕，加強入境人士體溫測試添，信佢一成，雙目失明，叮！

一句到尾，疫魔防不勝防，求人不如求己，內地官僚信唔過，港產官僚靠唔住，港人最緊要打醒十二分精神，自求多福吖！