SUN驚奇：Nel Nel：遮掩不如改變心態

「髮線高，頭髮稀疏，搞到我好似老咗十年，其實我得二十五歲咋。」阿榮向記者訴苦。 其實阿榮的處境並非罕見，不少脫髮青年悲嘆，為了挽救所餘無幾的髮絲，他們不敢大力梳頭、不敢Gel頭染髮，不愛游水；外出時要戴帽示人，遮掩尷尬，脫髮嚴重影響社交生活。

「唔好自己呃自己！唔通戴帽戴一世咩？」本港形象指導張學潤（Nel Nel）以過來人經歷教路，髮少不一定會令外觀「扣分」。與其留長頭髮或戴帽遮掩，不如將頭髮盡量剪短，可以「剷青」或光頭，令缺點變成自己的特色，「話唔定有人因為我光頭而認得我呢？」

Nel Nel說，雖然未必每種頭型都適合光頭，但如何打扮都非常重要，「每個人都有靚嘅一面，點樣面對脫髮問題，都係心態問題。」他認為，自覺脫髮為缺憾，全因自卑感作祟。男士們應欣然接受脫髮情況，甩頭髮都可以型。