SUN搞作：打橫嚟講：「奶粉令」從沒有效過！

香港廢柴政府之所以得到個臭朵，主要是庸官當道，嗱！嗰頭先至係威係勢，推出「限奶令」，打窒「走粉」嘅水貨客，並話不會手軟，確保香港嬰兒「有啖好食」，又自誇自擂大讚成效彪炳。

哼！殊不知，呢頭有件大陸中央高層話港府出手之重，搞到佢喺京城嘅孫女就快「斷糧」，無「香港走私貨」食，食衞局嘅高永文便立即開記招，宣布「限奶令」並非「永久」實施的政策，看來，應好快又回復昔日之「港奶自由行」嘅光輝日子矣！

老友，唔使等高醫生度橋應酬我哋吖！依家喺機場過關後，想買多多都有啦！呢招所謂「限奶令」不特止成為「不存在」的「廢法」，更是國際笑話的元素矣！

當大家集中視線在「光復上水」的關閘時，其他口岸，尤以沙頭角中英街，已成為另一桃花源，「走粉」活動不知幾興旺通暢，無掩雞籠咁任由水貨客自出自入。

奶粉問題之探討，講到口臭，除強國人喪心病狂、埋沒天理，「發明」毒奶粉戕殺下一代之外，也因大陸高官貪腐無良，不顧國家存亡（但佢哋成日要香港人「愛國」喎！）。若中央真係為國為民，又怎會任由毒奶粉不斷在國內生產呢？再者！又怎會喺深圳邊境仲可以咁猖獗、明目張膽地老奉派錢收貨。

話說回來，香港一班「走粉」師奶為四十元幫大陸人帶貨，賺得雞碎錢，人家卻刮取暴利後，大搖大擺袋一百幾十萬來港掃名牌，死唔死吖？

香港人，幾可憐吖？此乃叫折墮。

一早話過，做人要有骨氣，餓死都不能通匪類呀！當啲低賤嘅賊盜有錢過你的時候，再冇道義恩情可言，你只會賤過泥咋！明未？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府