政壇：政商定格：估輸樓價地產商申請裸奔

內地樓價升個不停，有人憂有人喜，地產界中人就各自測前景，深圳英聯不動產董事長郭建波同華遠地產董事長任志強，去年對樓市前景各有睇法，任志強認為樓價今年三月份會暴漲，郭建波就話三月會係下跌嘅轉折點，仲挑戰對方輸咗要喺北京長安街裸跑。事隔大半年，郭建波喺啱啱過去嘅三十號晚，喺微博上認輸，仲好認真咁向北京市公安局官方微博發出「裸奔申請」﹗

佢話考慮到「怕圍觀者眾，引發治安壓力」，所以提出申請，仲話：「我提前認輸並據有關規定向貴局申請批准本人近日履約。」唔知係咪接近愚人節，「@平安北京」就當郭建波嘅「申請」係開玩笑，唔打算喺微博回應，仲建議郭建波應該依法依規行事﹗唔少人都認為郭建波呢次「申請裸奔」係為自己搵下台階，不過佢就表明無論獲唔獲得官方批准，佢都會履約。