政壇：搞搞政：廢噏同性戀 周一鑊出醜

喺萬眾質疑下，翻閹做平等機會委員會主席嘅周一嶽，委任命令一出，已被人質疑佢對平等機會嘅認識同經驗都太少，點知佢厚住面皮上任嘅第一日就出醜，佢前日出席大愛同盟成立典禮時，為咗顯示自己好熟呢瓣，當正自己係萬能俠，從港府推行「限奶令」、香港普選、內地出現禽流感等都諸多意見，點知講同性戀問題時卻自暴其短，他話：「唔需要理會佢基抑或唔直」，莫非喺周一鑊心目中，基同唔直係有唔同定義？

周一鑊前日喺同志團體大愛同盟成立典禮中致詞，講到每個人生出嚟就有唔同嘅性傾向，就好似膚色、高矮肥瘦每個人都係唔同咁，仲話︰「我哋要尊重每個人有佢嘅基因、佢嗰個潛質，盡量發揮所長，令到佢哋喺社會度有貢獻，我哋唔需要理會到佢係基抑或唔直，呢樣嘢係唔需要考慮嘅。」佢一講完，即刻引起全場大笑。

佢呢邊口若懸河，嗰邊已經畀人笑到面黃，正所謂不知者不罪，但不知而扮知，甚至就唔熟嘅範疇指手畫腳，咁就現形喇，甚至成為廢官廢噏嘅最佳示範！