政壇：首爾考察陳克勤撲牙膏

立法會南韓考察鴨仔團喺核戰風雲下出發，雖然有人臨陣退縮、亦有人唔記得帶護照而趕到甩轆，但都順利抵達首爾，不過蝦碌卻繼續來。隨團鴨仔之一嘅民建聯陳克勤一落機就急不及待咁去購物，因為佢要撲牙膏同牙刷，克勤話因為酒店冇提供，所以要去撲。其實克勤身為環境事務委員會成員，理應以身作則支持環保，出行時自備牙膏、牙刷至啱。

一眾鴨仔前晚抵達之後，就急不及待去食當地嘅特式美食石頭窩飯，仲爭相喺社交網站發貼。佢哋呢行，主打節目之一係同當地環保團體見面，尋日啲議員同環團見面時就有人問，通過減廢法例對市民造成不便，點解政客唔驚將來敗選？環團秘書長就話因為有民主，民間團體就可以集結力量爭取政治支持。點知在場嘅自由黨張宇人就講笑話，咁香港要先有民主，再搞環保喎。