政壇：爆粗大狀爭做健仔中委

有「爆粗大狀」之稱嘅民建聯（建仔）司法及法律事務副發言人馬恩國，早前喺立法會同「長毛」梁國雄舌戰後一炮而紅，有人仲因而向大律師公會投訴佢，不過呢一切都無阻馬恩國服務建仔、喺政壇作更大發揮嘅心，事關人氣大增嘅馬恩國決定報名參選建仔新一屆中委選舉，佢到底係藝高人膽大？定係要更發光發熱？就要睇今次中委選舉嘅結果。

劉國勳兩公婆齊參選

建仔新一屆中委選舉喺本月中舉行，建仔中人近日陸續收到選票，佢哋需要喺六十二名候選人中選出五十二名新任中委，其中有三十八人係競選連任中委，首次或再次參選中委嘅有廿四人，最受矚目嘅候選人可以話係自言「我唔係律師，我係大律師」嘅馬恩國，事關自「爆粗」事件後，建仔中雖然有人估計馬恩國會低調潛水，估唔到佢竟然決定披甲上陣參選中委，喺候選人名單中榜上有名，可謂令唔少人跌眼鏡。

馬恩國接受查詢時未有評論早前「爆粗」一事對中委選舉嘅影響，強調唔知黨內兄弟對佢有乜印象，亦無刻意話一定選上，總之大家認為佢可以發揮下就畀個機會，亦唔會特別製作中委宣傳單張宣傳自己喎，認真有性格。

除此之外，至少有五名中委候選人係新界社團聯會嘅活躍成員，包括首次參選嘅漁農界立法會議員何俊賢、沙田區議員李世榮等，其中區議會「票王」劉國勳同呂迪明兩公婆仲首度一齊參選中委添。至於三十歲以下參選人有三個，其中最年輕嘅係年僅廿六歲嘅觀塘區議員顏汶羽。

另外，由於原民建聯副主席劉江華，聯同兩名建仔常委林光宇同歐陽士國退下火線，加上今屆新增一個常委名額，料將騰空四個常委空缺，不過由於選到中委係進身常委嘅第一步，睇怕中委選舉塵埃落定，又有一番龍爭虎鬥。