醫護草率成病 東院草菅人命

今日係愚人節，諗唔到東區醫院咁嘅玩笑都開得出，真係大整蠱！

乜嘢事？係咁嘅，患有高血壓嘅魏婆婆上星期因為喺街上暈倒而送入東院搶救，回復清醒之後喺女內科病房留醫，以為有醫護照顧好安全啦，點知反而危機四伏。魏婆婆兒子日前探望母親嘅時候赫然發現，擺放床前俗稱「排版」嘅病歷有問題，查根問柢之下揭發呢份「母親的病歷」原來屬於兩日前已經轉往東華東院嘅另一名女病人所有，簡單啲講即係畀人調錯病歷！

咁都得？調錯病歷後果可大可小o架。舉例講吖，就算同樣係暈倒，一個高血壓病人同一個低血壓病人嘅救治方法已經南轅北轍，院方調錯病歷隨時斷錯症、開錯藥，危害病人性命，何止大整蠱，簡直草菅人命！

病人送入醫院，性命就交喺醫護人員手上，如果醫護人員返工遊魂，做嘢失魂，病人仲有何保障呢？正如病人組織話齋，睇病歷核實入院病人身份係最基本嘅事，咁都搞得錯，公立醫院點會唔亂象叢生呢？咁搞法，市民如果唔想入院前寫定遺囑，睇怕就要寫定張病歷傍身，事關公立醫院嘅烏龍程度實在無法再令人放心。

不過話時話吖，公立醫院問題多多，醫護人員錯漏百出，患者所託非人嘅清單已經長過長期病患者嘅病歷咯。派錯藥、輸錯血、打錯針、調錯嬰同開錯刀時有所聞，連割錯女病人個胸都試過。以今次魏婆婆為例吖，如果唔係及早發現調錯排版，割錯胸搞到無乳問蒼天一幕未必會重演，不過畀人斷錯症，然後接受醫療事故一條龍服務嘅悲劇就好大機會發生！

點解公立醫院病咗咁耐都唔好呢？嗱，魏婆婆兒子嘅一句話好有啟發性，就係針唔拮到肉唔知痛！當佢向東院追究時，院方支吾以對，大耍太極，難免令人懷疑係想偏袒犯錯嘅人，甚至可能連邊度出錯、點樣出錯都費事深究。如果次次發生醫療失誤之後，醫院高層一啲都唔肉緊，一味想大事化小，小事化無，出錯嘅漏洞唔去堵塞，犯錯嘅人員唔去懲處，問題又點會改善呢？你諱疾忌醫咯喎，個病咪一世跟住你囉。

當然啦，醫療事故層出不窮嘅另一個原因就係當局無能，搞到公立醫院長期人手不足，醫護人員六個蓋冚十個煲，雞手鴨腳之下往往就害到病人雞毛鴨血。

總之，醫護草率已成病，當局如果再諱疾忌醫，你話公院安全，大家當愚人節笑話o架咋，叮！