SUN世代：吃得到的美

小眼睛看世界，仍不願閉起雙眼，小腳板闖天下，仍不願停下腳步，向前走目的是尋找「靚嘢」與人分享，這個好像是關琬潼（Shadow）的人生使命。她從小愛美，看到的世界全是色彩繽紛的美麗國度，為實踐夢想，她先後開設曲奇店、蛋糕店、乳酪店及生活專門店，再發揮其設計的天賦，帶人走出美麗人生。

「做曲奇、做蛋糕要做得靚，咁樣食嘅人都開心啲；整啲衫要整靚，咁着嘅人都開心啲。」整個訪問中，Shadow不斷提及「靚」字，愛美的天性助她走出燦爛人生。

不過，走進美的世界前，原來她曾是個翻譯員：「我好鍾意語言同文字，所以讀翻譯；但原來工作同我想嘅唔同，坐定定做翻譯都幾沉悶。」要她停下來，應比天塌下來還要困難：「如果有嘢去到一個位置就停，我會覺得好悶，所以要不停向前走。」

受熱愛廚藝的父母影響，Shadow自細對美食種下情意結，重新出發，就循美食一環開始，然而，她並非要當廚師，而是做食物造型師。「最初做網上蛋糕店，喺屋企整甜品，整整吓就開始寫食譜同飲食專欄，無耐就有人搵我做Food Stylist，係咪唔知呢份工做咩呢？係幫食物扮靚o架！」

天生愛美，Shadow對設計、藝術興趣濃厚，當食物造型師便可將美食、美學融合再展示，這正符合其夢想。鍾愛這份工，每次做Food Styling時她都做足準備，帶齊裝備及小工具上陣，將食物扮得靚靚。為了增進技術，她不停進修，睇外國烹飪書、雜誌，了解外國的食物造型發展。

入行八年，她已是行內知名的食物造型師，曾為多個著名食品廣告設計造型，高峰期每月接四至五個Jobs：「一個月接五個Job，已經好勁，每個Job事前要做好多準備工夫，由設計到拍攝，可能要成一星期，唔係執靚碟餸咁簡單。」

因擔任食物造型師，Shadow認識星級餅廚Tony Wong，助她攀上事業高峰。兩人於○九年開設曲奇餅店，她負責舖面及設計，Tony則負責食品。初開業，她面對千斤重擔：「初時好辛苦，因為乜都唔識，樣樣自己親力親為！」幸好痛苦的日子很快捱過，美味的曲奇再配合Shadow的特色包裝，曲奇店很快便打響名堂，後來還開設多間分店。

其後，她還與Tony開設蛋糕店及乳酪店。去年，她更開設自家品牌的家品服飾店，親手做各種靚衫。惟由食物造型師跳入時裝界，一切都要重新學習：「我唔係讀時裝設計，所以開舖都交咗好多學費，睇書、上堂，慢慢裁、慢慢縫，做好一件件靚衫。」因風格簡樸，服裝得到英國品牌的垂青，力邀合作。

「有人話做生意要搵到大錢先開心，但我覺得有人欣賞，我就好開心。」語畢，有客人到店內選購家品，Shadow即站起來招待，還親自介紹，聽到客人說：「我專登上網搵你舖頭，特登搭的士嚟o架！」她即露出甜美笑容，始終得到客人賞識是最開心。

Shadow's Profile

現職：Director of Bonne Chere Life Style Atelier、Director of Simply Pleasure Life Style Boutique、Smile Yogurt.Cake.Dessert合夥人、Patisserie Tony Wong合夥人、曲奇4重奏合夥人

學歷：香港浸會大學翻譯系文學士

興趣：插花、煮食、時裝、寫作