SUN搞作：打橫黎講：佔領到危機四伏了！

學者為普選特首領軍「佔領中環」，贏盡民心，因香港人大多要求中央對香港落實雙普選的承諾；查實，世上哪有人會贊同自己地方領導係由「假普選」產生的呢？

「佔領中環」，係政治話題，嚇怕好多政治冷感的人，佢哋覺得唔關自己事，也怕講多半句都會惹禍上身，不提也罷！好啦！唔講就唔講囉！

縱使唔提政治，也可講講民生、講講法治、講講公民道德吧！

今天的香港政府廢到無朋友，尤其是法治。一早話明，街頭路邊不得擺賣收錢做生意，但旺角、銅鑼灣和深水埗的行人專用區及地鐵站外，不是早就被電訊商的臨時「固定」攤檔阻塞通道嗎？

佢哋公然佔領兼兜售生意，何解警方視若無睹，廢得盲了眼？因佢哋無現場收受現金？但卻愈來愈猖獗，啲攤檔愈來愈大面積，愈擺愈開，尤其是在行人專用區，已去到無王管地步。

西洋菜街更是重災區，依家有班小販「老奉」的開檔擺地攤，收現金不特止，仲日日有爭地盤之吵大鑊，我不下十次見佢哋嘈到喊打喊殺，但唔多見有差人嚟做嘢。罪惡和罪案，就是由此積累而成的！

其實，呢條行人專用區已經去到極危險的時刻，每晚人多路窄，小販同收錢表演的賣藝人堵塞成條街，如不幸再有人高空擲水彈，我不敢想像，此處肯定「死傷無數」，所以，悲劇未發生之前，唔該香港政府做吓嘢，咪到時又搵嘢賴。

條街被人無法無天的佔領，並非政治事，而關乎民生安全、法治問題，但香港政府也管理唔掂囉！真廢！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府