政壇：政商定格：製藥業巨資建廠吸人仔

匯聚知名老牌藥廠嘅中華製藥總商會早前舉行理監事就職典禮，該會理事長兼京都念慈菴第二代揸弗人謝國昌話，公司啱啱喺元朗工業邨新建樓面面積達二十五萬呎嘅GMP廠房，舊年底投產。佢話由於內地消費者對內地製造或包裝嘅藥品疑心好重，寧願長途跋涉到港掃貨，所以佢決定落重本喺香港擴大生產線。

會長兼嶺南藥廠第三代傳人Coty呂偉強都打算搵地起新廠。佢話政府正訂定實施GMP嘅時間表，業界可趁機興建現代化GMP廠房，力保製藥業嘅優質傳統不流失，但由於投資金額都好龐大，業界希望政府給予支援同時間，唔好太急進。