政壇：搞搞政：攆走李國寶 立會暢順晒

喺上屆立法會，唔少建制派功能界別議員都表現欠佳，起唔到幫中央同特區政府保駕護航嘅作用，迫使阿爺明示暗示要換走班老弱殘兵，其中東亞銀行主席李國寶被開刀換走後，立會嘅運作都暢順唔少，財經事務及庫務局就最開心。

有財經局官員話，今屆立會多個同該局有關嘅功能界別議席都換上新人，當中以金融界嘅轉變最大，對佢哋嘅裨益亦最多，事關該局當年有乜關乎銀行業嘅政策想搵李國寶幫手向業界推銷，或者游說佢加入相關法案委員會幫政府同業界發聲，最經常得到嘅回覆就係：「對…對…對…對唔住，我…我…我…我唔喺香港。」令該局相當洩氣。李國寶外號「三點不露」、堪稱「立會四大懶蟲之首」係有原因嘅。反觀現任金融界議員吳亮星勤力又勇於撐政府，要求佢入會或發言都絕少推辭。

雖然泛民嘅梁繼昌喺會計界爆冷勝出，一度令財經局憂慮將來拉票會難咗。但經過幾個月嘅交手，局方發現佢絕非一般為鬧而鬧、為反對而反對嘅泛民，對於一啲獲得業界支持嘅政策或草案，仲會主動發言同入會幫拖；加上熟悉財經事務、同立場相對親政府嘅白鴿黨單仲偕重返立會，令財經局多咗兩個好幫手。