政壇：鄭明明擬轉戰歐美樓市

美容界「大姐大」鄭明明久不久就有買吓物業磚頭保值，據知佢樓同舖都有買，但政府接連推出「辣招」壓抑炒風，原來都有影響佢嘅投資意欲，佢一方面話暫時無意購買香港物業，另一方面又講到明會留意多啲本港以外嘅樓房，言下之意，即係有意轉戰歐美嘅樓市喎！

明明姐今年三月卸任全國政協委員，上月初自然唔使再到北京出席「兩會」，不過咪以為佢呢段時間會較為得閒，因為查實佢呢段時間都好忙碌周圍走。佢話趁「兩會」期間去咗美國，視察吓佢前年買落嘅單位，原來兩年之內，個單位已升值咗百分之三十，並有租客承租有得收租，另外佢囡囡亦都喺美國買咗個單位同屋企人住。