政壇：三藩市華裔市長與港有緣

三藩市首位華裔市長李孟賢前日旋風式訪港兩日，再轉飛北京進行上任後首次官式訪問，同行嘅仲有當地前任市長布朗（Willie Brown）。李孟賢祖籍台山、美國出世，但其實佢同香港嘅淵源甚深，早喺一九七四年已經以交流生身份，來港學習廣東話同中國文化，加深對三藩市華埠嘅了解同為之後踏足中國做準備，所以佢能夠講得一口流利嘅廣東話。

李孟賢尋日以一身便服現身酒店貴賓房，係佢出任市長兩年後首度非官式訪港，大讚香港係令人讚嘆嘅世界級城市，好似港人出街必備嘅八達通就好值得三藩市借鏡。

佢透露，今次行程會拜訪中國文化部等多個部長級官員，佢亦會趁機返家鄉祭祖，而廣州、中山亦係唔少三藩市華人嘅「根」，一行四十三人嘅代表團途經兩地亦會齊齊認祖歸宗。