政壇：劉佩宜同印傭用美食溝通

廣東話一向係公認難學嘅語言，唔少定居本港嘅少數族裔就因為言語不通而遭受歧視，難以求學及融入社會。香港女青年商會會長Pauline劉佩宜就諗到用食物作為雙方嘅交流工具，佢話同屋企嘅印尼女傭不時請對方品嘗吓彼此嘅美食，又會教佢炮製地道菜式，拉近彼此距離之餘，自己仲可以乘機學番幾句印尼話。

Pauline話該會嚟緊將由本地義工開班教授一套「字母操」，即係將中文拆件成為二十一個「字母」，配合簡單嘅手勢同口訣，讓少數族裔兒童更易掌握，希望佢哋快啲學好中文，咁就可以同港人「同聲同氣」喇。