政壇：周一鑊失憶反咬政府

自政府宣布「廢官」周一嶽出任平機會主席後，多個人權組織同監察政府機構已經表示不滿，相繼批評周一鑊任內庸碌無能，難成大器。估唔到周一鑊為咗反擊，喺愚人節上任嘅前夕，不單止同政府劃清界線，仲突然反咬政府一口，話過去十幾年教育局對少數族裔嘅工夫做得唔夠完善。嘩，未上任就四圍開火，佢好似唔記得咗自己上一年仲係政府中人喎。　

市民出糧養廢官

人貴自知，但廢官周一鑊似乎就唔多明白呢個道理，佢尋日未上任已經亂講嘢，無啦啦炮轟教育局過去咁多年都冇做嘢，令大批少數族裔青少年讀唔到大學，減少向上流動同晉升機會。雖然廢官當時係做食物及衞生局局長，但從未聽聞佢對少數族裔咁支持，亦未聽過佢發表呢啲真知灼見，依家先識講，你話係咪令人憤慨？俗語話新官上任三把火，但廢官未上任就令人把幾火，真係難為納稅人每月要畀十幾萬出糧畀佢，十幾萬寧願用喺有需要嘅市民身上好過。

如果就咁聽佢講，分分鐘以為佢係憂國憂民嘅一等一好官，但周一鑊好似忘記咗，不足十二個月前，佢仲係政府中人，而且位列局長級數，但佢就偏偏扮晒失憶，好似唔記得自己做過政府高官咁，將所有責任推卸畀人，唔知教育局局長吳克儉聽到佢呢番言論，會唔會無名火起呢？其實廢官周一鑊任內大把醫療事故、食品經常出現問題，鋪鋪都係大鑊嘢，所以周一鑊當年有稱號叫「每周一鑊」，但似乎佢冇任何反省，依家就學人開火，試問一個咁冇政治道德嘅人，點會有市民敬重呢？