釣友果洲群島人鯊角力

【本報訊】果洲群島上演一幕人鯊角力驚險事！上周數名釣魚發燒友，前往本港東南果洲群島岸邊垂釣，其中一人發現有大魚上釣，拉起魚竿收絲時，赫見上釣的竟是一條長約六呎疑似鯊魚，不斷在水面掙扎，同行友人用手機攝下人鯊角力驚險過程。

從片段可見，釣魚郎雙手緊握約十五呎長釣魚竿拉扯，非常肉緊，海面升起一條大魚，清楚見到類似鯊魚背鰭。在旁友人興奮大叫，期間魚竿被拉扯至彎曲，顯示大魚斤兩十足，豈料爭持約三十秒，魚絲折斷，大魚潛入深海逃去，片段傳來釣魚郎大呼：「噢、斷咗啦！」據稱，鯊魚甚少游埋岸，上釣亦非常罕見。