限制查冊激民憤 弱勢政府又跪低

民意唔係浮雲，倒行逆施必撞大板。嗱，又有辦你睇嘞！

喺各界猛烈炮轟之下，港府終於跪低，暫時擱置已通過但未實施嘅新《公司條例》，呢啲咪就係倒行逆施嘅下場囉。呢條被稱為惡法嘅新例，禁止公眾查閱公司董事完整身份證號碼同住址資料，除咗削弱傳媒監察力同公眾知情權，挑戰香港核心價值，亦令打工仔追討欠薪難度大增，所以咯喎，一出台就引起各界猛烈批評，唔跪低至奇。

不過咁，雖然當局迫於輿論壓力而認衰，暫時擱置惡法啫，但惡法一日未除，始終仲有手尾，隨時可能翻叮。新聞界人士要求永久擱置，咁先至係治本之道吖嘛。

話時話，港府巧立名目，不斷推出阻礙傳媒採訪嘅措施，搞到新聞自由不斷倒退，香港舊年嘅全球新聞自由排名已經下滑至第五十八位，如果惡法實施，新聞自由進一步收窄，公眾知情權所餘無幾，香港嘅排名隨時包尾都似。

新聞自由係香港核心價值，依家核心價值被肆意踐踏，除咗新聞界同勞工界強烈反彈，商界亦唔收貨。早前有商會去信政府反對收緊查冊限制，直斥新例會助長貪污、洗黑錢及欺詐行為，損害本港高度透明同公平嘅營商環境。仲有吖，前任公司註冊處處長都睇唔過眼，狠批新例會令香港淪為詐騙、洗黑錢嘅溫床，拖累國際商業與金融中心嘅形象。港府倒行逆施，搞到眾叛親離，你話係咪捉蟲吖。

其實，呢條惡法之所以能夠通過，港府固然係始作俑者，但立法會議員亦罪無可恕o架。呢，當日審議新例，平時將自由民主掛喺口邊嘅泛民議員出席率奇低不特止，就算坐喺議事堂亦只係「魂遊太虛」，連質疑都冇句，卒之令惡法喺無人反對下通過。最離譜就係，見到新例引發民怨，呢班政客即時反轉豬肚，高調反對，搏命抽水。神係佢哋，鬼又係佢哋，旨意咁嘅投機政客監督政府，為民請命，簡直就係緣木求魚。

太一叮都係嗰句，公眾利益冇價講，新聞自由大過天，政府同政客都靠唔住，捍衞核心價值始終都要靠廣大市民。嗱，大家千祈要（目及）實吖，任何殘民惡法，都唔可以留低，叮！