Sun奇古怪：Sun潮語：鬼古

到底呢個世界有冇鬼？到咗二十一世紀，科學界都仲未有定論。但無可否認，香港甚至世界各地好多人都依然對呢類超自然事物、作邪作鬼嘅事充滿興趣。最近，號稱香港最大嘅網上電台宣布執笠，當中有個講鬼嘅節目、由潘紹聰主持嘅《恐怖在線》，更加令到晚晚聽開鬼古嘅聽眾變成苦主，更喺社交網絡成立群組，苦苦哀求網台唔好執笠。

呢班聽眾，大有可能已經上咗鬼古癮。不過，近日有關呢個網台執笠嘅事，成為咗網絡世界一個熱門話題，當中亦牽涉一啲政團組織不為人知嘅秘密，謠言陰謀論滿天飛，有好多甚至被稱為「鬼古」！潮語「鬼古」絕對同鬼魂或靈界嘅朋友完全無關係，雖然同樣都係古仔，同樣都係好恐怖，但係絕對唔係超自然。

潮語「鬼古」中嘅「鬼」，係有另外嘅意思。「鬼古」嘅意思係話一個「鬼鬼哋」嘅人所講嘅事，就叫做「鬼古」。「鬼鬼哋」所指嘅唔係外國人或混血兒嗰隻「鬼」，而係話講嘅人或故事中嘅人有「內鬼」或俗稱「鬼頭仔」嘅嫌疑，又或者可能有啲蠱惑，或者係佢講嘅嘢有出蠱惑嘅成分。

「鬼古」就係泛指呢啲關於邊個邊個其實係臥底之類嘅古仔或流言，又或者邊個邊個其實係中共特務之類嘅傳說。通常呢啲都係講到繪影繪聲，百分之百真人真事，但事實係點？真相係點？則完全唔重要，大家都係當古仔聽，聽完就share，咁就達到咗散播謠言嘅效果。所以「鬼」字應該用「弔詭」嘅「詭」字更為正確。

呢個人心不古嘅社會，到底邊個係人邊個係「鬼」，真係用照妖鏡都照唔出。加上陰謀論充斥，一個人喺網上發表一啲嘢，都可以隨時上綱上線加鹽加醋無限創作成為「鬼古」。