SUN搞作：少膽虫手記：外判添希望

淫賤黎講到天花亂墜，但係由「永唔賣盤」變「現唔賣盤」，遲吓會唔會又好似林奮強單嘢咁，聽唔到個唔字，變咗賣盤o架？總之呢個風頭火勢，少膽虫要幫佢補鑊，有擦鞋以外嘅嘢做，都算顯出老腫十萬蚊月薪嘅身價喇。不過，之前勸退元老不成，炒人恐怕都好難，點先可以兜番呢？少膽虫思前想後，決定聽專家話：「一係自我了斷，一係長揸等執」。

少膽虫平生第一次昂首闊步，踏入淫賤黎間房，招呼都唔打就講：「老細，想唔執，自我了斷啦！」「自我了斷？！」淫賤黎雙手立即放枱下，似要保護甚麼寶貝。

「係！譬如斬《ME》！」

「斬咪？」淫賤黎二話不說，即護胸前兩點。

「係《ME》呀！」少膽虫霸氣盡現。「好啦，你話斬就斬啦。」淫賤黎拿起電話，說：「廚房佬你拎把刀上嚟，今晚加餸！」

「你叫廚房佬做咩？」少膽虫不解。淫賤黎詫道：「你叫我斬你嘅！」

「《ME》唔係我呀！你唔知自己有份雜誌叫《ME》咩？」少膽虫竟然動咗少少真火。淫賤黎居然唔怪罪，可能聽到唔使執就唔介意：「哎呀！早講啦，呢排無拮針，唔係好記到呀！斬咗就可以年賺十三億？」少膽虫遙望窗外堆填區，緩道：「止血就得，要賺仲要有信念。」淫賤黎即刻認叻：「我錢就無，信念就大把！」

「係要有外判嘅信念呀！」少膽虫解釋：「一判唔夠，再二判；二判仲唔夠慳，再三判四判。如此判上判上判，壹全霉肯定可以肥上瘦下，留番啲錢養班元老呀。」淫賤黎猛然醒悟：「係喎！咁先係做老闆o架嘛！」隨即又擔心：「但係遠水點救近火？」

少膽虫其實無諗過有得救，於是隨口噏：「咁你真係要將你年賺十三億嘅信念成日掛喺個口度，催眠唔到人都起碼催眠到自己，好過啲啦。」

點知淫賤黎真係不斷催眠自己，好似黐線咁大叫：「我發達喇！我賺好多錢喇！」門外員工聽到，都忍唔住搖頭，估唔到佢仲口快快同人講埋添……

少膽虫