SUN搞作：Sun官場現形記：「磚家」點睇新沙士

港大拆解新沙士之謎，發現病毒可以喺三日內攻陷肺肝腎腸胃及免疫系統，殺傷力極強大；再加上連兔仔都會受感染，如果疫症蔓延，情況堪憂。於是李衞特登訪問「磚家」，希望可以點條生路畀香港人行吓。

李衞：新沙士依家有所謂嘅「攞你命三Day」，究竟我哋點預防好呢？

磚家：新沙士？有新嘅咩？

李衞：你唔知咩？

磚家：唔係呀……根據國際醫學期刊最新研究指出，《國產凌凌漆》中，達聞西發明嘅「攞你命三千」，可以以毒攻毒，對付「攞你命三Day」，居家旅行，帶定傍身，確有功效。

李衞：唔……磚家，你嘅建議有啲……

磚家：唔實際？

李衞：你可以咁講，雖然我想話無厘頭。

磚家：但係關於預防兔仔染病，我有個實際好多嘅做法。

李衞：願聞其詳。

磚家：就係好似蓋茨咁，資助研究下一代「安全兔」喇！哈哈哈哈！

李衞：其實磚家你咁廢，真係好面善。你好似係港大嘅榮譽院士？

磚家：係呀，我係縮骨科聖手，大家叫我Doctor Chow！

李衞：周一鑊！？

一鑊：嘻嘻，多謝我啦，新沙士等我走咗先返嚟！嘻嘻！

李衞：︿＠＄＊）＆＠＄！