政壇：政商定格：吳永嘉入深井歎靚奶茶

中華廠商聯合會副會長吳永嘉（Jimmy）忙緊遲啲喺廈門舉行嘅工展會，日前佢抽空去咗深井一間隱世特色士多，品嘗即場沖製嘅咖啡、港式奶茶，仲有創意十足嘅「鐵觀音拿鐵」。呢間士多其貌不揚，其實曾獲「金茶王」銅獎，奶茶每杯索價六十八元，咖啡更售一百二十八元，貴過大酒店。

Jimmy早前經朋友介紹前往幫襯，盛讚環境舒適，裝修同擺設都好懷舊，呢度有七十年代嘅膽機、黑膠唱片、大喇叭，又有搖椅畀顧客安坐，邊歎茶邊聽音樂。Jimmy笑言鄭師父好有性格，想品嘗佢嘅手勢要打電話預約。講到「鐵觀音拿鐵」，呢種茶係以鐵觀音茶葉磨成粉末，加入忌廉及鮮奶各半，用大瓷碗端上奉客，奶味與茶味夾到極。鄭師父教路，呢度嘅靚茶咖啡要好似飲紅酒咁細味品嘗，每呷一口層次都唔同。