政壇：搞搞政：阿涂克勤赴「核戰區」憂心

十八位立法會議員與多名環境局官員，將於下周一啟程前往南韓，考察當地嘅源頭減廢同處理固體廢物經驗。但朝鮮半島局勢近日進一步惡化，擁有核武嘅北韓聲稱已下令導彈瞄準南韓多個目標，南韓當局亦隨即提高戒備，一場世紀核戰疑似一觸即發。未見過戰爭、更莫講核戰大場面嘅立法會議員估唔到咁大鑊，白鴿黨涂謹申同建仔陳克勤都顯得好小心。

身兼保安事務委員會副主席嘅涂謹申（阿涂），尋日向友人發出短訊，自稱去緊核戰區。佢之後再向本報講，話已經睇晒英、美等地嘅傳媒報道，覺得今次未必係流嘢，即使考察團唔取消，亦應通知團友此行有一定風險，等佢哋自行同家人商討應否成行，但佢就聲言自己唔係好驚，除非局勢進一步惡化，否則會繼續去。

團友克勤仔更早喺三日前已經靜雞雞搵咗今次考察團嘅團長何秀蘭（阿Cyd），詢問萬一人哋開火，佢哋個南韓考察點搞？結論係除非港府發出旅遊警示，先至會取消行程。一眾議員都係執定防核輻射嘅頭盔加裝備穩陣啲！