政壇：坪石補選傳泛民又內訌

最近兩次區議會補選，泛民主派都協調失敗，派出超過一名候選人參選，最後當然畀建制派漁人得利。好似沙田鞍泰選區補選就係民主黨同新民主同盟對撼，最後益咗對手民建聯，沙田田心選區補選就係民主黨同人民力量大戰，最後益咗公民力量，嚟緊觀塘區議會坪石選區補選，泛民又被傳再內訌。

前坪石區議員陳百里加入政府出任商務及經濟發展局局長政治助理，建仔計劃派出陳百里嘅前助理、亦即立法會議員陳鑑林（橄欖）嘅愛子陳俊傑參加補選。泛民方面率先曝光嘅係前黃大仙區議員民主黨嘅徐百弟，兩人現已於區內狂貼單張，搶閘拉票。徐百弟係民主黨前區議員林森成嘅老友，後者與橄欖喺坪石選區激戰多年，徐百弟今次接替年事已高嘅林森成，空降坪石「隔代」挑戰橄欖個仔，有一定睇頭。

但人力立法會議員黃毓民嘅愛徒黃洋達亦被傳有意出戰坪石，當事人早前否認咗，最新消息係社民連亦有意染指該區，但礙於社民連前主席陶君行，喺舊前綫同支聯會都同徐百弟好老友，所以改派陶君行太太、依家做緊民陣召集人嘅孔令瑜出戰。我哋尋日搵唔到孔令瑜本人回應，不過社民連中人就強烈否認此事。