政壇：陳靄群被冒發呃錢電郵

呃錢黨常用招數係認親認戚扮老友，最新一招係扮地區人士。尋日我哋收到一封以東區區議員陳靄群名義發出嘅電郵，話佢喺西班牙做醫療服務時被人偷咗銀包，身上嘅護照、回程機票唔見晒。電郵聲稱佢曾經尋求中國駐當地領事館協助，但佢哋唔係好幫到忙，所以請收到電郵嘅人士匯九百幾歐元、即係萬幾銀港幣過去畀佢江湖救急，話遲啲返港時一定會還錢喎。

一睇電郵就令人起疑，例如雖然電郵下款寫住「陳靄群區議員」，但發出電郵嘅地址就同佢喺區議會登記嗰個電郵唔同，而且個主旨仲寫住由「Mr. Chan（陳先生）」發出，但陳靄群其實係一位女議員。我哋抱住疑團打咗幾個電話聯絡陳靄群，求證佢係咪平安。啱啱由柬埔寨旅行返港嘅陳靄群話，佢一返到就聽到有朋友咁講，澄清絕無其事，呼籲支持者唔好信。