政壇：Greg蘇睇波懶理限奶

限奶令推出之後，雖然喺打擊水貨客同穩定本地奶粉供應上即時見效，但內地就好不滿，兩會期間批評聲不絕，之後又發生錯誤檢控事件，搞到食物及衞生局局長高永文一日要三次道歉，保安局局長黎棟國就一邊上京，一邊要呵住前線員工。比起呢兩個箭靶，負責貨品出入口嘅商務及經濟發展局局長蘇錦樑（Greg蘇）就好逍遙，喺限奶令事件中完全隱形，官場已有不滿聲音。但派卡片好叻嘅蘇局長仲未知衰，日前出席活動時竟然自爆有閒情睇香港國際七人欖球賽嘅電視直播，仲大講冷笑話點火頭添！

限奶令出現反效果，原本支持嘅政黨又反枱，呢個時候正係官員體現團隊精神嘅時候，但負責限制受規管貨品出口嘅Greg蘇卻潛晒水。或者限奶令得失內地，為個人官運及前途計，隱形不失為一個好選擇。又或者Greg蘇真係忙於其他公務啩。

致詞無厘頭

Greg蘇日前出席一個鐘錶業商會嘅就職典禮就自爆，呢日做主禮嘉賓嘅佢不但遲到早退，仲疑似連講稿都無準備好，上咗台要不斷東拉西扯，甚至搞爛gag拼湊內容。佢致詞時話近日忙緊睇七人欖球賽，期間遇到電視直播突然中斷，就即時轉到互聯網希望繼續觀看，點知轉得嚟場波已經打完。佢跟住話希望以此說明時間真係好重要，而時間重要係因為鐘錶呢個行業都好緊要，佢呢番無厘頭嘅說話搞到在場唔少人O晒嘴，或者聽到呢段說話嘅公務員更加嘔血。

之後Greg蘇又講到中央有乜政策協助香港廠家，好宏觀咁引咗句「總理溫家寶」嘅工作報告，係人都知中央政府換咗屆，現任國務院總理係李克強先啱，雖然佢係引述工作報告，但呢個說法難免引來誤會。難怪有人私下寸爆Greg蘇，話佢既然知道時間咁重要，就唔好嘥晒啲時間睇欖球賽，以及喺免費電視發牌事件上一拖再拖喇！