嬰兒車惹風波 平機會添煩亂

平機會嘅宗旨話就話係促進社會共融，消除歧視，可惜事實啱啱相反，佢哋成日無事生非，製造爭端，消除歧視係假，帶頭歧視就真。呢嗱，又有辦睇嘞！

話說平機會製作咗一套電視節目，講述一名手抱嬰兒嘅男乘客，因為無摺好嬰兒車就登上巴士，被司機要求收起嬰兒車，否則唔開車，事後呢名爸爸向平機會投訴。於是乎，有位平機會嘅代表就煞有介事咁警告巴士司機，指司機或者已經觸犯《家庭崗位歧視條例》喎，而巴士公司代表更加要喺電視鏡頭面前公開致歉添。

簡直九唔搭八！司機緊守崗位，要求乘客摺好嬰兒車先至開車，呢個明明係行車安全問題，同家庭崗位歧視有乜關係呀？係人都知，嬰兒車未摺好就登上巴士，唔止阻塞通道，易生混亂，仲隨時會撞傷乘客，釀成意外添，司機執正嚟做係履行職責，保障其他乘客安全，平機會反而指司機可能違法，擺明老屈啫，咁對司機公平咩？又對其他乘客公平咩？

再講吖，司機要求乘客摺好嬰兒車，唔係想唔想做嘅問題，而係法例規定。《公共巴士服務規例》規定，司機有責任提醒乘客將嬰兒車摺好並妥善安放，呢條規例係運輸署批准嘅，依家平機會亂發炮，豈不是同政府唱反調？以後叫巴士司機點做先？平機會九唔搭八，徒添爭拗，簡直係無事生非，無聊透頂！

巴士工會係咁講嘅，平機會嘅節目內容嚴重擾亂觀眾視聽，兼夾有醜化巴士司機之嫌，擔心影響業界日後執行正常車務運作，要求平機會澄清同道歉。而節目星期二出街後，通訊事務管理局已經累計收到幾十宗投訴。

咁講啦，平機會添煩添亂，除咗無聊，更加無腦，智商可能比腦囟未生埋嘅嬰兒仲要低。嗱，如果巴士司機認為受到不公平對待，想告平機會「職業崗位歧視」，相信好多市民會舉腳贊成！

話時話，平機會無事生非都唔係新聞咯，早就見怪不怪，無計啦，鬼叫平機會係一個政治花瓶咩，平時無所事事，除咗撩是鬥非，仲有乜嘢好做吖，政府養肥呢班人，簡直浪費納稅人金錢。正如有人話齋，最應該摺埋嘅唔係嬰兒車，而係平機會！

係喎，差啲唔記得，平機會下個月有新官上任，就係翻閹廢官周一嶽。嗱，咪話太一叮唔提醒，周一鑊你唔好再渾噩嘞，快啲補番呢隻鑊，如果唔係，你好快執包袱嘅咋，叮！