SUN搞作：少膽虫手記：愛與和平的「賬號」

喺呢個時刻，少膽虫好沉重。因為一句「壹全霉唔使裁員」，作為老腫嘅少膽虫就要諗盡辦法幫淫賤黎圓謊，於是喺堆填區兜咗個圈，想勸退啲元老，咁咪唔算炒人囉！

講到元老，又點會走甩社長「懵橋」？少膽虫戰戰兢兢咁入去佢房，諗住開口嘅時候，「呯」一聲，懵橋就手震震打爛個花樽。「哎呀，呢個法蘭西製汝白瓷大花瓶，係慈禧太后賜畀我太公個仔，當年儲番三四年錢先贖得返嚟o架！可惜！可惜！」懵橋意有所指，繼續話：「壹間公司無個好睇嘅花樽擺吓，你話幾庸俗、幾肉酸先得o架？少膽虫，可？」呢個懵橋又懵唔晒，咄咄逼人，心諗壹全霉又真係已經好肉酸，呢個唔炒得。

少膽虫出房後，走去裝一裝大寫手「牢瘋」個位，只見佢睇埋啲英文嘢，寫嘢又唔似少膽虫，長乃乃咁，唔知發牢騷定噏瘋。少膽虫搖搖頭，嘆嘆氣，心諗壹全霉無幾個人識字，呢個唔炒得。

少膽虫再兜吓，見到「十九才子」喺茶水間飲嘢，寒暄幾句時發現佢飲緊涼茶，原來係平時抽水太多，要「祛濕」咁話。少膽虫搖搖頭，嘆嘆氣，心諗，呢排春天嚟，天氣潮濕，呢個又唔炒得。

巡完返番位，隔籬集中營嘅「貴屠」就講笑咁話：「吖，少膽虫你巡嚟巡去，每日寫幾百字，幫啲假新聞同人道歉就搞掂，其實你都幾得閒喎！」點知真係一言驚醒夢中虫，炒人呢件事，人工唔貴就唔會屠，少膽虫終於明白最應該炒嘅人，其實係自己。就係呢個「不方便嘅真相」，先至搞到少膽虫咁沉重。

因此之故，未雨綢繆，為免無飯開，少膽虫佔領《爛果》，特登公開「賬號」畀大家，希望善長仁翁本住愛與和平嘅精神，踴躍捐輸，救救少膽虫！

少膽虫愛心賬號:sdchung709394