政壇：政商定格：莫宜端懷念未嫁時夠瞓

傳媒人出身嘅勞工及福利局政治助理Zandra莫宜端，加入政府後生活作息「正常」好多，朝早五點幾就起身，七點幾出門返工，比起記者經常深夜十一、二點至收工，十足古人「日出而作」咁健康，冬天時仲早過太陽起身添！不過，佢話好懷念做記者嗰段未嫁時光，可以瞓到自然醒，仲話呢個係佢人生最大嘅改變喎！

Zandra話平時返到屋企，一對分別四歲半同一歲半嘅仔女多數已經瞓咗，如果仲未瞓，佢就陪佢哋上床，仔女瞓咗至起身開電腦繼續做嘢，平均每日只瞓得五、六個小時。佢仲話小朋友通常朝早六點幾就起身，所以佢返工前會加插一段親子時間，陪子女玩或讀故事書，盡吓做媽咪嘅責任，然後搭港鐵返工。難怪佢話掛住做記者時，可以瞓到好晏至起身，話晒當時仲未嫁，唔使湊仔嘛！