政壇：搞搞政：黎陳芷娟澄清絕不劈炮

雖然「限奶令」涉及進出口事宜，但就由食物及衞生局局長高永文牽頭處理，而商務及經濟發展局局長蘇錦樑全程影都唔見，惹嚟唔少官場中人紛紛耳語，尋日仲突然傳出食衞局常秘黎陳芷娟做得唔多開心搞到遞信辭職，惹起政界官場一陣騷動，即使食衞局嚴詞否認「絕無其事」，仍未能撫平騷動。

黎太尋日如常出席立法會審議「限奶令」小組委員會，甫現身即被傳媒追訪，但佢重申絕無辭職呢回事，又話傳聞無根據。被問近排處理「限奶令」係咪好大壓力，佢就話政府都係全心全力服務市民，最大希望係透過法律保障香港嬰兒有足夠奶粉用。

見黎太做到咁辛苦，唔少議員都不忘紛紛鼓勵吓佢。新民主同盟范國威就鼓勵黎太話推限奶令天經地義，仲話希望黎太深思一下係咪真係要辭職，博得黎太一笑，而白鴿黨單仲偕就戥黎太唔抵，事關過往上次香港出現食米供應問題都係商務及經濟發展局主理，但唔知點解今次唔見蘇錦樑出現。黎太就大方回應話，今次限奶令歸食衞局主導「絕對唔係問題」，事關該局對食物供應有政策責任。