政壇：涂謹申當囝囝係興奮劑

立法會「超級」議員由全港選民投票選出，諗都諗到工作量一定重啲，但超級議員涂謹申就話同做地區直選議員嘅工作量冇乜分別，唯一唔同係依家搭港鐵時要特別小心喎！

阿涂話以前喺九龍西出選，投票畀佢嘅都只係九龍西選民，但依家就係全港選民，得票三十一萬幾，街上同港鐵上隨時遇到投咗票畀佢嘅市民，所以搭港鐵好留意，費事用手機低頭上網時，市民誤會佢唔同人打招呼，好似好寸咁。至於工作量點解冇分別？佢話做咗二十多年議員從未得閒過，所以唔覺得因為做咗超級議員而特別忙咗。

佢依家除要出席區議會會議外，仲加入咗立會八個委員會及至少八個審議法例嘅法案同附例委員會，平均每日接收十個市民個案，所以惟有分配好時間。但佢話從冇感到壓力，因為囝囝信之嘅出生為佢人生帶來好多歡樂，好似佢嘅「興奮劑」咁，睇到佢啲相就非常提神咁話，再加上太太同家人嘅百分百支持，所以全無後顧之憂。