政壇：肥亨讚啟剛有晶晶支持

商務及經濟發展局前局長「肥亨」馬時亨前日出席青年聯會賢慧社嘅講座，分享佢從新經濟觀看新男女關係。肥亨開口第一句就話自己刻意唔打呔上陣，係為咗襯番一班無拘無束嘅年輕人，常務副主席霍啟剛聞言，即刻笑笑口咁除低條呔，認真識做。

初為人夫嘅啟剛同青聯主席Adrian葉振都坐喺第一排，全程好留心咁聽，唔通想從中偷師？肥亨話無論男女都好，兩個人相處難免有意見不合嘅時候，至緊要係互相尊重。佢大爆兩個星期前先同太太鬧完交，最終一樣和好如初，秘訣就係千祈唔好喺火遮眼嘅時候，衝口而出講啲冇得返轉頭嘅說話。最後當然係要顯出男士風度，平心靜氣咁主動同女士溝通啦。

跟住肥亨又話當一位男士搵到個賢內助喺背後支持自己，對事業同人際關係都會有好大幫助，然後笑指啟剛就係一個好例子喎。佢演講完之後，成班靚女爭住同佢影相留念，十足十大明星咁款。